DAHOD

દાહોદનું બેદરકાર આરોગ્ય વિભાગ

 

દાહોદ શહેરના ફાયર સ્ટેશન નજીક ધમધમતા રસ્તે મેડિકલ વેસ્ટ જોવાતા લોકોમાં ગભરાટ ફેલાઈ ગયો હતો. આ મેડિકલ વેસ્ટ 3 કલાક સુધી રસ્તે રઝળ્યો હતો. કચરાની ગાડીમાંથી વેસ્ટ પડ્યો હોવાનું લોકોએ જણાવ્યુ હતું. કોઇ તબીબે નાશ કરાવવાના બદલે મેડિકલ વેસ્ટ કચરામાં નાખી દેવાતાં લોકોમાં રોષ ફેલાયો હતો.

 

દાહોદના માણેકચોકથી નીચે ઉતરતા ઢાળે ફાયર સ્ટેશન અને નવા શાકમાર્કેટની વચ્ચેના રસ્તે ગુરુવારે સવારના સમયે મેડીકલ વેસ્ટ પડેલો જોવાતા કોરોનાથી માંડ બહાર નીકળેલા લોકો ગભરાઈ ઉઠ્યાં હતા. ઈન્જેક્શનો, બ્લડ સેમ્પલ, સિરીંજ અને કોરોનાની ટેસ્ટીંગ કીટ વગેરે ધરાવતો આ મેડીકલ વેસ્ટ રસ્તા વચ્ચે રેલાયેલો જોવાતા લોકોમાં તર્કવિતર્કો જન્મતા ચર્ચાઓનો દોર આરંભાયો હતો. કોઇ તબીબ દ્વારા આ મેડિકલ વેસ્ટનો નાશ કરાવવાના બદલે નગર પાલિકાના કચરાના ટ્રેક્ટરમાં નાખ્યો હતો. કચરાને ડમ્પીંગ યાર્ડમાં લઇ જતી વખતે આ મેડિકલ વેસ્ટ નીચે રેલાયો હતો. જોકે, ટ્રેક્ટર સાથેના કર્મચારીઓને આ બાબતની જાણ થઇ કે નહીં તે જાણવા મળ્યુ નથી.